大家都知，我系非常尊崇巴菲特。之前为咗去股东大会，先成为巴郡股东啫，B股而已，几百蚊美金，唔系咩好巴闭嘅事。反而真正令我有感觉嘅，系亲眼见到个棒交俾 Greg Abel 之后，我一路都有留意佢。我对巴郡管理层，系继续有信心，所以我都系继续越攻巴郡。 近期巴郡股价真系好凌厉，仲跑赢一堆大股，我系又喜又悲。喜，梗系觉得自己眼光OK；悲，就系我持有太少，唉，完全唔够喉。但如果讲点解佢会咁硬净，我觉得核心其实好简单：Cash is King。 巴郡坐拥三千几亿 cash，喺而家呢种波动市、甚至股灾或者市跌嘅环境，最能够受惠嘅其实就系佢。因为佢真系可以慢慢拣平货买。第三季佢动作唔算多，最大动作反而系回购。你当然可以质疑，股价升幅有一部分系自己买回自己；但反过来睇，佢就系有咁嘅资本实力去买回。呢个位本身已经说明咗好多嘢。 我拆过几季巴郡盘数，结论其实冇点变：巴郡唔系一间容易理解嘅公司，甚至可以话系超级复杂。因为佢同一般公司唔同，佢同时有营运收入，同埋投资收入，所以你用好简单𠮶套去睇，未必睇得明。但如果你真系拆开去睇，我会话营运方面问题唔大，投资方面问题都唔大。 今季收入增长11%，以巴郡呢个体量去计，唔差。纯利回落，主要系因为投资收益由上季220亿，回到今季120亿；但你话120亿差唔差？其实都仲系唔错。即系话，上季太劲，今季回返少少，唔代表基本面突然有咩大问题。巴郡最重要嘅底盘，始终都喺度：保险、铁路、能源，再加埋投资组合，令成盘生意唔系净系靠单一一瓣。 另外有一单我自己几留意嘅，就系佢向西方石油买 OxyChem 呢类交易。收购价值大概94亿，你当100亿去理解就最简单。头几个月赚两亿左右，利润率大约5%。5%听落好似唔多，但对巴郡呢种玩法，重点唔系短期有几爆，而系100亿资产如果可以稳定做到大约5%利润率，即系每年5亿，呢啲就系好典型巴菲特／巴郡 style：稳定现金流、portfolio 收益，同埋长期慢慢增长。如果佢可以keep住呢个利润率，而资产价值又随住时间、随住通胀慢慢上，呢类deal其实系好和味。 而且呢单仲有个附带效果：巴郡本身又系西方石油股东，向西方石油买走呢个业务，某程度上都可能令西方石油财政好啲，对巴郡原有投资有间接帮助。呢个位，我觉得几有趣。 再有一点，佢接下来再发日债，市场自然会睇住：会唔会意味之后再增加日本投资？金额未知道，所以而家唔好讲到太实，但起码呢个系可以留意嘅催化。 总之，我对巴郡继续有信心。唔单止因为巴菲特三个字，而系我对 Greg Abel 接棒后嘅管理都有信心；再加上而家个市况，本身就系 cash is king 嘅世界。当市场波动、当有平货要执，巴郡呢种配置同现金实力，真系特别著数。
看多 BULLISH