你问我今晚CPI会唔会出事，我自己真系唔算好负面，起码短线唔系。睇返过往几次，当飞龙同CPI出得好近，中间唔系隔成个月半个月𠮶种，市场好多时会有种「二合为一」嘅形态：即系唔会话CPI一出就即刻完全推翻前面飞龙带出嚟嘅方向，反而多数系沿住原本个势去行。上星期数据后个势已经有少少转角反弹，所以我自己倾向觉得，今晚CPI出完，头段可能震一震、休息一下，但如果个数据唔系非常超预期，或者远低于预期、变化大到离谱，理论上都系延续返上星期飞龙之后𠮶段走势。短线我觉得比较大嘅阻力，标普大概系7600几点，即系之前𠮶支大棍落嚟前嘅高位附近。 另一样我会睇嘅，就系成交。昨日QQQ、SPY反弹，都未见到一啲好异常、突然放到好大嘅成交阳烛。呢样反而系好事。因为按我自己一路睇开，美股好多时大跌完反弹，如果中途突然爆一棍好强、成交又突然劲大，短期反而容易要休息，隔一两日开始横行或者抖一抖。相反，如果反弹过程入面，成交冇再进一步异常放大，甚至慢慢缩细，通常仲有空间继续反弹。所以我而家反而会留意，SPY一路弹上去嘅过程，会唔会突然有一日成交放到好大、又或者去到阻力位先放量打一打上去；如果系咁，短期就可能要休息下、横行下。但休息完，唔代表冇机会再上，呢点都要分清楚。 所以总结我自己而家对美股/标普嘅睇法：我一啲都唔系好担心，整体我都OK，短线仍然偏向反复向上。只不过，反弹到某个比例之后，有少少回调其实好合理；再加上接落嚟又到NVIDIA业绩，去到纳指、标普啲阻力位附近，市场有机会先进入观望状态。到时如果啲大佬交成绩表，原来又系冇乜特别问题、甚至好过预期，咁个反弹咪有机会再延伸落去。 最重要都系睇今晚：如果唔系出现好夸张嘅回落，又一大棍打落嚟，我觉得整体仍然还好。至于操作上，最佳最佳嘅上车位，一定系等佢回一回先再睇；你话而家追得唔得，唔系唔得，但要自己知足。对我嚟讲，等一个小回出现，会系更靓嘅上车机会。大概就系咁，Sorry，呢个就系我自己嘅结论。
看多 BULLISH