看多 BULLISH
台积电呢一季嘅业绩，其实已经足够说明一切。讲真，台积电点解可以成为全球代工之王，唔系只靠技术，仲靠一样好多人冇真正睇到嘅嘢：点样研判地缘政治，点样同唔同国家、同大型公司打交道。呢个先系佢嘅看家本领。如果你熟台积电、熟张忠谋个背景，你会明白佢点解咁识同美国打交道，呢种能力唔系今日先有。 所以我对佢董事局今次两个决议系非常赞赏。一个系加派息，由七元加到九元，大家当然开心；但另一个我更加欣赏，就系以不超过5亿美元嘅限额去认购Envlope同OpenAI嘅股票。呢个当然系投资决定，唔系话攞钱掉落海，因为佢哋本身就系全世界最重要嘅AI模型之一；但同时间，呢个亦都好明显系一个政治活动、政治操作，而且我会话，系好聪明𠮶只。 点解我会咁睇？因为而家正正系风雨飘摇之际。市场一边惊AI烧钱，一边惊AI发展前景，又撞正中期大选可能变天。台积电今次等于用脚投票：我支持Envlope，我支持OpenAI。准确啲讲，唔系抽象咁支持AI发展，而系用钱表态——我全力支持美国AI发展。呢类动作，正正就系点样攞到朝野之间信任嘅重要举动。 所以我只能咁讲，业绩再加埋呢种政治智慧，真系唔使多讲。好多人净系识睇技术、睇晶片、睇工厂，但台积电最劲嘅地方，从来都唔只系制程，而系佢知道点样喺大国博弈入面企位、点样同最大嘅玩家打交道。今次呢个举措，我觉得真系几帅。