大家而家食花生，成日集中喺黄仁勋私生活，我认为𠮶个唔系最大镬。都系𠮶句，真正好大镬嘅，系中国渗透、规避美国出口管制呢样嘢。婚外情只系令credit更差、更加难撑，但如果背后真系有相当比例晶片、算力、收入，绕过美国监管流入中国，咁件事就唔系公关危机，系监管、司法、政治风险一齐爆。 如果真系好似有人讲到最尽，去到两成，一季业绩一千亿，两成就二百亿，一年四五百亿级别，咁你话夸唔夸张。呢啲唔使等乜嘢先，罚款风险已经唔细，因为你摆明系无视美国法例。更麻烦嘅唔止系罚钱，系成个体制里面有几多环节被渗透咗，你搞唔清楚。咁就算你处理咗黄仁勋本人，公司都仲要面对美国司法部或者监管机构对成个NVIDIA做body check，呢个先系最头痕。 而家公司话揾独立调查委员会，呢啲系人事处理、damage control，唔系话冇用，但核心问题唔系呢度。就算再爆多啲私生活细节，我都系同一句：最核心唔系黄仁勋本人啲花边，系佢背后有冇中国利益、有冇路径去规避美国法例。如果一个本来唔可以正途出口去中国嘅晶片，最后原来可以透过某啲途径绕过去，而且金额去到几十亿甚至更多，咁你自然会问：呢个究竟系纯粹被人compromise，定系公司本身都默许、甚至有利益？ 再加埋政治层面，件事短期内更加难厘清。民主党而家见到Trump对出口管制放软手脚，又被指对呢啲警告视而不见，我系民主党我梗系借题发挥，口头施压都好，搞你黄仁勋就最好。共和党入面又唔系一把声：有啲撑Trump嘅会想转移视线，真正MAGA、防中𠮶批又会追住嚟打。即系两边其实都有动机做大呢件事。你喺呢种政治气氛之下，想短时间讲清楚、拆弹，唔容易。 所以市面开始传step down，我反而觉得系迟早问题。短期揾一个内部资深人，甚至CFO act住先，稳定局面，呢个系典型操作，做得到。但唔好以为换咗人就解决。到2026年我反而觉得，产品研发进度大致上已经上轨道，黄仁勋离开对operation未必最致命；真正影响大啲嘅，系business development、对外关系、同供应商攞货、同台积电倾产能、同美国政府或者其他政府打交道。好多时人哋系畀黄仁勋面子，你换个二号人物出嚟，未必个个都买帐。再加上，如果你原来系一个被compromise咗嘅CEO，美国仲信唔信你？供应商仲信唔信你？counterparty仲信唔信你？呢啲全部都系后遗症。 仲有，之后有几多货其实规避咗美国、𠮶堆货本身有几多问题、公司上上下下有几多关键环节已经被渗透、将来美国政府同国会会唔会再收紧，力度有几大，呢啲全部都系大不确定性。连H200、H100、A100呢类AI晶片都已经被拿上台讲，后面仲有冇更多嘢，冇人敢讲。 所以我个立场好简单：我唔会买NVIDIA，亦都唔会建议其他人买。唔系话佢冇回报想像，而系呢个风险我唔会攞。投资唔系证明自己识捞底、比人叻，我要回报，仲要瞓得着。除非之后你睇到规避美国监管嘅规模、被渗透程度，同国会/美国政府后续行动力度，都清清楚楚厘清；如果只系换人，但核心监管同渗透问题未厘清，风险仍然喺度。
看空 BEARISH