中性 NEUTRAL
Tesla 连跌好多日，负面消息继续有。上星期佢自己做咗个图畀大家睇，大家本身已经有预期，结果仲差过预期。 成个 2025 年，Tesla 交付 163.6 万架，比 2024 年 179 万架跌咗 8.6%，亦都系连续第二年录得年度销量下跌。 点解去年情况咁差？第一，市场竞争真系好犀利。比亚迪去年销量高达 225 万架，Tesla 只有 163 万架，唔系话赢少少输少少，系人哋远远抛离你，你喺后面连尾灯都见唔到，尘都冇畀你。 第二，美国去年第四季开始取消税务优惠，买车意欲自然减少。虽然 Tesla 推出平价版 Model 3、Model Y，但因为续航力缩水，功能又差，所以都未能扭转销售弱势。 今年 Tesla 自己面对嘅情况，其实都系剧烈竞争、产品老化、政策逆风、税务优惠取消，仲有品牌形象，即系 Elon Musk 𠮶个情况。不过佢都揾到新亮点，包括无人驾驶同储能业务。 储能业务更加系去年 Tesla 成绩表入面唯一亮点，产品做到 14.2 吉亚时，创历史新高。 所以估计今年市场虽然持续低迷，但因为未来 SpaceX 上市，亦都有其他炒作，储能业务、FSC，再加上更多平价车型，市场仍然期待可以有返少少气息。