我对Apple嘅睇法，其实几简单：公司质素好，管理超级强，今季业绩整体OK；但股价而家真系贵，仲有佢呢排跑赢，我觉得有一部分系食咗个时势。 点解咁讲？因为而家个市场好唔钟意人烧钱。你睇其他Hyperscaler，要买好多算力、研发AI model，CAPEX劲重；Apple唔系完全唔搞AI，但佢个玩法冇咁进取，某程度上系「你哋研发，我用你哋𠮶啲」。结果喺而家呢个时空，越唔烧CAPEX，反而越吸引。呢个好黑色幽默，但市场就系咁。 讲返盘数，本身唔差。收入1145亿，增长12%，仲创历史新高；纯利307亿，都系增长12%。大数上冇乜大问题。分地区睇，北美稳定增长、欧洲稳定增长，大中华都仍然OK，日本反而麻麻。分产品睇，iPhone系微增，Macbook表现几好，Services增长最好，穿戴就跌咗少少。即系话，本业冇爆雷，仲系一间好识赚钱嘅公司。 而我一路都觉得，呢类股票要升，首先要有必要条件。Apple有，仲好清楚：本身赚好多钱，产品有优势，生态圈有优势，cash又多，营运又好。唔系只只呕咗好耐嘅股票都有呢个必要条件，Apple系有，所以佢唔同。 不过今次业绩，市场有少少唔满意嘅位，系毛利率。表面睇好似ok，但其实有大约1%系税务回扣之类嘅因素；撇除之后，毛利率系勉强低过48%，即系少少差过预期。呢个唔可以完全当冇事，因为市场惊嘅系成本压力。主要两样：第一系云端／算力成本，第二系记忆体成本。依家整体RAM供应都紧，乜都贵晒，咁就连Apple记忆体成本都大增。 但点解我话管理超级强？就系喺呢种成本压力之下，佢整体都仲顶得住，而且product mix其实几好。最关键系Services，呢个segment毛利率大概七成，对冲到整体毛利率压力。所以你见到毛利率冇话散晒，反而反映Apple成个组合管理得几靓。呢个位，我系几buy。 所以如果你问我，今次业绩证明咗乜？我会话，证明咗Apple系一间管理超级强嘅公司。公司本身冇乜太大问题。 我唯一真系唔钟意嘅地方，就系估值太贵。我自己计，17至18倍PE会比较合理；但市场而家畀到36倍PE。咁高，唔系纯粹因为盘数靓，而系有唔少系资金避险、避开𠮶啲要重手烧CAPEX嘅AI股，于是涌去Apple。呢个我觉得系现阶段市场风格问题，多过公司突然间基本面靓咗一倍。 所以我对Apple系中性偏欣赏：公司我系欣赏嘅，管理我都服嘅，业绩亦都OK；但价钱真系唔平。再讲白少少，佢而家受捧，系建立喺市场现阶段惊花钱、钟意cash is king、钟意避险之上。 而呢个位，未必系永远。可能几个季度之后，AI又再被吹捧；又或者如果油价、通胀回落，市场冇咁怕花钱，觉得高增长重要过节制CAPEX，啲钱系有机会由Apple流返去Hyperscaler。到时Apple而家呢种相对吸引力，未必仲企得咁稳。呢个因素占股价几多，我估唔到，但我觉得大家要留意。
中性 NEUTRAL