看多 BULLISH
我总括来讲，今次政治风波对NVIDIA嘅实质影响，我倾向觉得未必太大。点解？因为成个AI链条，NVIDIA始终系中心点；再落去工业4.0、5.0，呢条路系洗湿咗个头，回不了头。AI而家讲到底都系几个大国喺度做，其他国家多数都系旁边学，美国冇理由唔做。所以我唔觉得民主党会拆散NVIDIA，反而更大机会系借相关人物同特朗普嘅关系去做政治文章，开特朗普刀，而唔系真系对NVIDIA本身落重手。 但我都唔会讲到好轻松，因为而家件事未完。真系要等下个礼拜个闭门会议，睇大家围住之后点样处理，揼边度、揼手定揼脚，先至知道。所以短期我会等事件明朗，呢个系前提。 另一个位，就系如果冇咗黄仁勋，后面管理层顶唔顶到。呢个当然系风险，突然间公司会唔会好似欠缺咗一啲嘢？呢样我唔敢话完全冇。但你又可以谂返，当年Apple冇咗Steve Jobs，后面都未必有大问题。我希望NVIDIA都系咁。如果最后证明NVIDIA本身冇乜问题，管理层运作又冇被实质破坏，咁呢啲位置我觉得系OK。 价位上，我自己会觉得145美元附近最好，150美元我都觉得系好价钱。141我自己摆过，做唔到，冇计，变化好多。我明白而家大家会惊，我自己160都买过，所以我唔系企喺度扮神仙。你而家先唔好完全唔惊，留返一啲害怕嘅心情，先等闭门会议出嚟再讲。 仲有一样一定要分开睇：就算NVIDIA单一事件处理得好，你可以搏佢反弹，冇问题；但唔好以为咁就代表美股冇事。美股整体我觉得仍然有危机，呢个要记住。即系话，我对NVIDIA冇咁悲观，但唔等于我对大市好乐观，两样嘢要分开。