我都系𠮶句，今个月我对半导体系偏乐观，甚至可以讲系几乐观。昨日我都讲过，CPI同飞龙咁接近，其实未必真系会好影响到啲乜；而家你见到个盘面，道指冇乜大变化，但纳指系有力，SOXX 呢一刻都系弹紧，呢个画面本身已经唔差。 点解我会咁睇？好简单，资金玩法就系咁。前一两个星期半导体一路冧，啲钱咪抽去传统股、道指𠮶边啰；而家𠮶堆之前拉起咗嘅传统类，有机会开始被人抽返出嚟，去捞返半导体。呢个资金轮动，如果你有炒开，其实唔陌生。某程度上，道指转弱、入横行整蛊阶段，反而对纳指、对半导体指数，系好事。呢样今年尤其明显。 再讲技术面。半导体指数由10月头高位跌落嚟，最急、最伤𠮶段跌势，我认为已经破咗。呢个系重点。即系话，个跌势唔系话即刻 V 弹到上天，但最恶𠮶一下过咗，咁后面个局就唔同玩法。 当然，唔系话一路直线升。接落嚟比较大嘅阻力，我会睇 106 到 108 呢个范围。点解？因为 10 月尾第一口急跌之后反弹前嘅低位，大概就系 106 附近；再加上之前一个较大嘅阻力/支撑区，大概系 108 至 110；再叠埋 10 月头跌落嚟𠮶条趋势线，去到呢啲位又系差唔多撞正。所以 106、108 呢浸位，大家真系要打醒十二分精神，呢度唔系细阻力。 如果由 9000 一口气弹到 10800，你谂下，一个指数级嘅嘢短线弹 15% 至 20%，要抖一抖，系正常到唔正常。唔好话 20%，15% 我都觉得要休息。所以如果短线再夹多一口上去，我会预咗佢有机会休息一两日、两三日。呢个我唔会当佢系坏事，反而休息又系机会，偷到位其实系唔错。 所以总结我个睇法就系：11 月半导体唔会太差，我仍然维持呢个 view。纳指也好，半导体指数也好，呢段跌势我认为最终系会破。再看好少少，今个月如果反弹得顺，半导体指数睇返高一级，我觉得返去 125、126、129 呢啲区，甚至你话上返「12楼」附近，即 12000 几，我都唔觉得奇怪。因为𠮶啲位，本身就系之前大横行范围嘅顶、阻力区，唔系我乱吹，系图上见到嘅嘢。 大概就系咁。短线去到阻力可能要抖，但我对半导体呢个月，仍然系乐观。
看多 BULLISH